تونقال

هر کیمسه نین چوره یی داشدان چیخیرسا بیزیم چوره ییمیز دنیزدن چیخیردی
هر ایل اولدوقو کیمین بو ایلده لوسمان حمداله اربابدان پیش پول آلاراق آتامی دنیز قیراغی پَرَه ده آشباز شه ییرد یازدیرمیشدی اکینه جه یین ال ایاقین یئغییب پاییزین گیره جه ینده؛ آتامدا یوز اون بئش نفر فهله پره چی له بیرگه شله کوله وارین برکیدیب قارشیداکی قارلی قادالی داغلاری آشماق ایسده ییردیلر؛ال اله قول قولا وئرن کروان باشی گئدیکجه یورولوب دالا قالانلاری شله سین آت قاطیرا چاتیب خسته لیکدن گئچینیب داغدا اولنلری یول اوزونو مئشه توپراقلارینا آمانات تاپیشیریب یوبانمایاق دئییه یولا داوام ائلیردیلر آلتی یئدی گون پیادایول گئدیب اَمنَن دوشن فهله یورولماقلارینا باخمایاراق اوز دوشدوکلری ایش یئرلرینده نه بیلیم آلاچیق دوزلدیب یاشاماق یئری راهلامالیدی ؛آتام ینی یئتمه گنج اولدوقونا گوره گئچن ایللر آشباز شه ییردیک ائله ییب هردنده اوغورلانیب کله جیده آواری چکنده ؛قیسسا بوی اولدوق اوچون  الی پالانایا چاتمایاندا لوسمان بیله سینی هَدَه له ییب گئری قایتاریردی ؛آناسی نین خسته اولدوقونا گوره آشباز شه ییردیگینن چیخاردیقی ماییش عایله خرجینی اوده یه بیلمه ین آتام پره باشجیلارینا یالوار یاخار ائلیردی کی من آشباز شه ییرد یوخ بلکه دنیز گئتمک ایسده ییرم؛آخی بیلیرسیزکله جی له دنیز گئدن فهله نین ماییشی نئچه قات قیراخدا ایشله ینلردن چوخ اولوردو؛پیش مالا آتامین دایام دیره مین گورنده پره باشچیلارین راضی سالماقینان آتامی کله جیده باش آواری چکن تایینات ائله ینده دنیزده  کرم سوفراسینی آچیب توکولن تور آغیز بوغوز دولو گلیردی؛ بیر نئچه ایل بئله ایشی اوغورولا قاباغان گئدن آتام یاواش یاواش دیللره دوشوب آدینا دنیز آسلانی دئیردیلر ؛بیر دونه ایلده رحمسیز فئودال پره باشچیلاری اوز ایشلرینین خیرینه قیشین اوغلان واقتدی کی دنیزین باش قالدیران طلاطمولی دالغالاری قیزمیش یالقوزک کیمین ساحیله یوروش آپاریرمیش؛بیر گون گئجه یاریسی کارگر فهله نی اویادیب علاوه دن دنیزه یولایاندا ایللر بویی قودوز دالغلارالا دویوشن دنیز آسلانی یولداشلاری لا بیر گه بو سفر کی اجل توروندان قوتارانماییب قدار فیرتینالار گمیسی نی چئویرنده قارنی بورونوندا حیات یولداشی نان خسته آناسی نین گوزون یولدا قویان آتام خزر دنیزبویدا اوزونه مزار سئچمیشدی؛داها دوغروسو من حیاتا گوز آچیب اوزمو تانییاندان چولده تای توشلاریم بیلمه ساتاشیب آتاسیز اولدوقومو باشیما چالاندا آناما سووال وئریب آتامدان سوروشاندا؛ گوزلری دولا دولا بئله بیر بایات ایلا بویومو اوخشاردی

ائگید اوغلان قیلینج گوتور آتامین
قارلی داغلار آچدیقیجا یاتا مین
کیم لیگینی سوراشانا بئله دِء
خزر بویدا مزاری وار آتامین

گونشلی نئفت گاز یاتاقیندا حییاتین ایتیرن دیلداشلاریمین عایله سینه باش سالیقی یازدیم

1-پره--دنیز قیراغیندا تورچولوق (بالیق توتماق)دم دسگاهی دئمکدیر
2-آواری --پارو دئمکدیر
3-باش آواری-- گمی نین باش سوروجوسو(ناخدا) دئمکدیر
4-پالانی--کله جیده باش آواری چکه نین دوردوقو یئری دئمکدیر
5-لوسمان--یوز نفرلیک بو ایش تشکلات گوروپون باشجیسی دئمکدیر دنیز گئتمک ایشینده تجربه صاحابی اولمالیدیر
6-پیش مالا--لوسمانین یاردیمجی سی(معاونی) دئمکدیر
5-قارنی بورنوندا--بویلو و حامیله قادین دئمکدیر