تونقال

گنج عشقعلی نین آتاسی خالخال ایزاناب دئدیگیمیزکند یاشامیندا *قارا(اکینه جک یئری اولمایان)اولماغیناباخمایاراق؛اوغلو ائل آرا بویوک باشلارینان اوتور دور ائله ییب مجلیسین هر طرفینده اوتورسایدی؛طرزی باشی کیمین او یئر آغیر گلردی؛الینن گلن حاقسیزلیق ائله یینلره قارشی چیخیب ایاقلانان فاقیر  بئچارایا حمایه سی گئچیب آرخا دوراردی ؛عایله ده ایکی قارداش بیر باجی اولدوق لاری اوچون آتاسی آغیر ایش اوجو باتینان بئلیندن شیکست اولاندان سونرا گنج اوغلو اکینه جک واقتی بونا اونا بیچین بیچیب اوز ایللیک زومارلارینی الده ائله ییردی؛دورد کیلفتی باشی کسیک قویوب حربی خیدمته چاغیریلاندا جیب خشلیگی اولمادان ایکی ایل خوزستانین ایسدیلرینه دوزرکن بیر یولدا اولموش اولسادا عایله گوروشونه گله بیلمه میشدی؛اولوم دیریمینن حربی وظیفه سینی باشا ویریب ائولرینه قاییدان عشقعلی آتاسی نین فلاکتلی یاشامینی گورنده بئش اون گوندن سونرا چانتاسی نی گوتوروب باش کدده ایشله مه یوللانمیشدی؛بیر غیرتلی تورک بالاسی کیمین عایله نین قیدینه قالیب ایشله دیگی پولو حیصصه حیصصه کنده یوللایاندا عایله سینه تاپشیریق وئریب مال قارا آلین دئییه موراجعیت ائله ییردی؛بیر آز زاماندا اوز عایله سی نین ماییشی نی یولونا قویان عشقعلی دوره برده گوزلیگینن آدی دیللره دوشن نازی گول آدلی بیر سو سونا سی کیمین قیزین عشقینه دوشور؛ناز گول خانیمین گوزلیگی حاقدا دئمه  لی سوز بو کی اونون اوجا بویی قیرمیزی آلما یاناقلاری قولاچ ساچلاری و جیران باخیشلی گوزلری و یاخود قوچاق یئریشی بوتون خالخال میانا بولگه سینه های هارای سالمیشدی؛قیز قاپیسی شاه قاپیسی دئییه اوزاقدان یاخیندان یار یاراقلی گلن خانلار و بئ ائلچی سی ناز گولون گوزلیگین ائشیدیب  اونو اوزلرینه گلین ائتمک فخر ایله قندهار کاروانی کیمین قاپیلارینا دیز چوکوردولر؛امما بو ائلچی لرین ایچینده وار ثیروتدن کاسیب اولان عشقعلی اوز ایسده یی ناز گول خانیما اورک باغلاییب گئت گئده لالا گول یاپراغی قیزاران کیمین  سئوگیسی آرتیردی؛چونکه عشقعلی دوزومون دوز سئچمیشدی؛ اونا گوره کی او بیلیردی ؛هر کیشی نین دالیندا بیر ار قادین اولماسا او کیشی نین اوت اوجاق اولماغی چتین اولاجاق؛اوزون بیر چکیش برکیشدن سونرا ایسده یینه چاتان گنج  عشقعلی ناز گول خانیمنان عایله قورا بیلمیشدی؛بیر کددی بالاسی کیمین اوزو یاشماقلی نازی گول گلدیگی ائوده عایله نین بیر عضوی اولاراق گونده لیک ایشله رینده حییات یولداشینا دایاق دیرک اولوب اونان چئیین چیینه گله جک یاشایشلارینین تمل داشلارینی مین آرزی لا قوروردورلار؛آتا آناسیلا بیر ائوده یاشایان عشقعلی اکینه جک واقتدی سوئوشوب آغاجلارین یاشیل یاپراقلاری قیزیل رنگه دونوب بالا بالا توکولن  واقتلاریندا حیات یولداشی لا حالال لاشیب سون تاپیشریقیندا اونا آتام آنام الله آمانتی دئییه چانتاسی چئیننده *یولچولارا قوشولوب گیلان دنیز قیراغیندا پره چیلیک ایشینه یوللانیردی؛پره چیلیک ایشلرینده ده نیظام اینظیباطی اولان  گنج عایله سینه چورک قازانماق اوچون هر گون اوزون دنیزه ویریب چوخلو *آواری چکنلره باشچیلیق ائدردی؛قیشین اوغلان چاغیندا کددن خبر گتیرن قاصید هاممی نین سوز سوفارشین دئییب عشقعلی دئمه لی سوزو بو کی آی بالا تانری ایرحمت ائله سین آتان دونیاسینی دئییشیب ؛اوزلوگونه سیغمایان بوسوز عشقعلی نی سارسیدان کیمین سحر تئزدن ایش یولداشلارینان آییریلیب گیلان خالخال قارلی داغلارین آشاراق ایزحمت کش آتاسی نین مزاری اوسته دیز چوکمه گه تئله سن شرفلی غیرتلی بیر اوغول کیمین بویوک چیلله نین گورها گورونده  آخشام اراده لرینده کیوی شهرینده ماشیندان انیب قیش قاری نین قورشاغا چیخماغینا باخمایاراق گئجه ینن اوزون قاطیر گئتمز *اوچ آغاجلیق *کسه یوللارا ویریب قارا باتیب چیخاراق گئجه نین بیر یاریسی یورقونلوق عرفه سینده یولون ایتیریب صوب خوروز بانینا کیمین ناغیللار قهرمانی کرم کیمین قارلی کولک له دویوشنده  ال ایاغین سویوق ویریب دوشدوگو یئرده اولوم دیریم آنلارینی یاشاییر؛تانریدان عومری قوتارمایان اولمه ییجک دئییه ؛بیر الله بنده سی یولدان گئچن هاراینا چاتیب بیله سینی تهلوکه دن قوتاراندا کددلرینه آپاریب عایله سینه چاتدیرمیشدی؛آنا اوغلونون بو آنلارینی گورنده سوئوق ویرمیش اللرینی الینن ایچینه آلیب آنان اولسون بالا دئییه گوزیاشلاریلا اونو یانار تندیرین باشینا دولاندیریردی بلکه ده بالاسینی بو تهلوکه دن قورتارسین؛امما عشقعلی نین نه قدر داوامی چوخ اولساییدا قارلی قادالی قیشین سویوقی اوز ایشین گورموشدی؛دونموش بدنین بوزو آچیلدیقجا ال ایاق بارماقلاری توکولوب چوخلو تورکه داوادان سونرا یاراسیز حالا قالمیشدی؛امما حاییف کی ناز گول بو حادیثه دن سونرا یوز ائلچی لرین ایچینده سئچدیگی اوغلانی بو حالدا گورنده تای توشلاری نین شمادتی عرفه سینده اوز سئوگیله قوردوغو ایلقارینا دال چئویریب حیات یولداشینی کدر آخشاملاری ایله دیز قوجاق قویوب بوشانیرام دئییه بور بوقچاسین گوتوروب آتاسی ائوینه یوللانمیشدی................. 

ایشی نین سونونوبئله گورن عشقعلی عوض قیزی آدیلا گئدن عومور یولداشی نین دالینجا بئله آغی لار سویله میش  جان تاپشیرمیشدی   

گئدی سن گئت یوخدی سوزوم نا اینصاف 

بئله قورمامیشدیق عهدی ایلقاری  

قاییت دئدیم آل جانیمی سونرا گئت  

قیشا دوندی شان عومرومون بهاری  

سنی دئییب وارلیقینا خوش اولدوم  

یالا باخدیم یاماجینا توش اولدوم  

قوزقون جایناغینا گلن قوش اولدوم  

یالقیز قویما قالا گوزو آغلاری  

عوض قیزی دال چئویرمه عشقینه  

نه دوشموسن آییریلیقین مشقینه  

رحمین گلسین درد الیندن دوشگونه  

یار آتارمی کونول سئودیگی یاری

*آواری-بیر ایکی مئتره یوخون کندیر ایپ دئمکدیر دنیز کانارینداتور چکنلر اونون بیر طرفین دنیزدن چیخان بالیق تورونون اوجونا باغلاییب بیر طرفینده چئیینلریندن سالیب چکردیلر

*اوچ آغاج-18کیلومتریول دئمکدیر

*کسه یول-بیراهه یول